兩性生活：婦女團體力撐鳳樓合法化

2008-08-25

較早之前，喺香港出現一個妓女殺手，令全港市民震驚，更加令業界促請有關當局正視妓女嘅安全問題，不過時至今日依然冇咩動靜。而喺英國嘅漢普郡就有相同嘅情況，希望政府將妓院合法化，但係提出意見嘅就唔係黃業組織，而係當地嘅婦女團體！

婦聯運動

外國人好明白團結就是力量嘅道理，所以歐美各地嘅工會會員人數眾多，所以工會有足夠力量同老闆談判甚至對抗，為打工仔尋求更合理嘅待遇。同樣地，外國嘅婦女團體亦都一樣咁多會員，就好似英國漢普郡嘅婦聯就有多達6,000 個會員，直接令佢哋發起嘅各種維護女權嘅運動更加有影響力。最近，呢個婦聯團體又有新搞作，就係推動漢普郡妓院合法化喇！領導呢個運動嘅62 歲Jean Johnson 話：「我哋係思想先進嘅機構，希望藉住呢個運動，令有關當局為妓院發出經營牌照，令佢哋可以喺安全嘅地方工作。」

危機四伏

Jean Johnson 亦表示，歐盟好多國家，例如係荷蘭，喺保護妓女方面比英國開明得多，除咗發牌畀妓院之外，性工作者仲能夠得到衞生檢查，對性工作者以及客人都有保障。而漢普郡婦聯之所以極力推動呢個妓院合法化運動，其實係因為去年12 月，漢普郡嘅一個小村落發生駭人聽聞嘅妓女謀殺案，案件當中仲有5 名妓女慘遭殺害，令婦聯意識到性工作者嘅人身安全被政府完全忽視。再者，過去幾年，有多達400 名婦女被偷運到其他城巿當娼，而警方進行大舉掃蕩之後，逼到好多妓女由市區轉移陣地，去到遠離大街以及沒設置閉路電視嘅暗巷工作，直接令佢哋嘅人身安全更加冇保障。

四出取經

為咗推行妓院合法化呢個運動，於是Jean Johnson 就聯同另一位會員一齊飛到歐美等地，四圍去參觀當地嘅妓院，觀摩各種妓院嘅特色，以作取經之用。而佢哋嘅第一站就係荷蘭嘅著名紅燈區阿姆斯特丹。喺阿姆斯特丹，佢哋除咗見識到紅燈區最出名嘅櫥窗獵艷過程之外，仲發覺妓院之內有規定每個嫖客都一定要使用安全套嚟保障衞生，而且房間入面仲有齊洗手盤、花灑以及平安鐘。呢個平安鐘可以喺性工作者遇到危險，例如係嫖客醉酒鬧事，或者係嫖客動粗嘅時候，可以畀妓院內嘅保安知道，及時上前展開拯救。所以呢個平安鐘對於性工作者嚟講，係一個非常重要嘅裝置。

至於第二站，就係美國內華達州。喺呢個地區，鳳姐多數都係以應召形式經營，由客人講出要邊類型嘅鳳姐之後，就會有專車送鳳姐到場，客人覺得收貨就即刻到附近嘅酒店進行交易。

最後一站，則去到新西蘭嘅郊區。婦聯會員發覺當地嘅郊區有好多外形樸素嘅屋仔，每間屋仔都分別有一至兩名鳳姐進駐，最特別嘅地方，就係每間屋嘅大門都有一個圓形小窗，有客人上門嘅時候，方便鳳姐先睇吓客人嘅容貌，如果覺得對方唔夠靚仔，仲可以拒絕接客添！

合法化六準則

經過兩名婦聯會員四出取經之後，佢哋發起嘅漢普郡妓院合法化運動就有好多明確又合乎性工作者利益嘅提議喇！而最主要嘅重點就係以下六個：

1. 妓院應該設喺郊區以免影響市容。
2. 每間妓院嘅細房都有一個平安鐘，保障人身安全。
3. 當局定期為鳳姐提供衞生檢查。
4. 強制嫖客使用安全套。
5. 小型妓院都裝設小窗戶於大門。
6. 有權唔接唔鍾意嘅客人。

東方日報 2008-08-25